2022

Hreinsun hjólbarða á vetrartíma.

Mikilvægt er að vetrarhjólbarðar séu hreinir en þeir safna tjöru og öðrum óhreinindum við akstur á hálkuvörðum vegum. Við það verða hjólbarðarnir hálli og veggrip minnkar. Þegar ekið er um vegblæðingasvæði þarf að huga sérstaklega að hreinsun hjólbarða. RNSA beinir því til allra ökumanna að þvo hjólbarða reglulega með dekkjahreinsi.

Hættur í umhverfi vega.

Þar sem slysið varð var hús innan marka öryggissvæðis vegarins, eða  í um átta metra fjarlægð frá vegbrún. Einnig var trjálundur við veginn og voru þéttir trjárunnar við ytri mörk öryggissvæðisins sem skertu útsýn við gatnamótin. Bendir nefndin á, að mikilvægt sé að huga að þeim stöðum þar sem trjágróður er farinn að vaxa nálægt vegum og grípa inn í áður en hann skapar hættu. Bendir nefndin jafnframt á mikilvægi þess að trjágróður, sjálfsprottinn eða gróðursettur, sé ekki of nærri þjóðvegum þar sem ökuhraði er mikill.

Leiðbeiningar framleiðanda.

RNSA telur mikilvægt fyrir eigendur bifhjóla að fylgja leiðbeiningum framleiðanda um öryggisatriði sem snúa að ökutækjum þeirra.  Í þessu tilviki var ekki farið eftir leiðbeiningum framleiðanda um smurningu og útskipti á slitinni drifkeðju.

Loftpúðar fyrir farþega í framsæti.

Af öryggisástæðum hvetur RNSA innflutningsaðila ökutækja að flytja ekki inn bifreiðar án loftpúða fyrir farþega í framsæti.

Hálka og glerhálka

Ísing myndast oft á blautum vegum þegar smám saman kólnar. Ísing sem þessi getur líkst blautum vegi, en myndar spegilslétta og nær ósýnilega þekju á yfirborðinu og því getur verið erfitt fyrir ökumenn að átta sig á aðstæðum. Slíkur ís á vegum er oft kallaður glerhálka eða glæra.

Rannsóknarnefnd samgönguslysa hvetur ökumenn til þess að vera vakandi fyrir hálku og við hvaða aðstæður hún myndast helst. Ökumenn ættu að vera sérstaklega á varðbergi þegar lofthiti er undir 4°C og vegur virðist blautur. Hægt er að finna fræðslu um færð og veður, veðurviðvaranir og fleiri upplýsingar þess efnis[1], horfa á myndband um ísingu og hálku[2] sem og hvernig bera má kennsl á hálku[3] á heimasíðu Samgöngustofu.

Frekari upplýsingar um vetrarakstur er að finna á síðu Félags íslenskra bifreiðaeigenda[4].

[1] https://vedur.is/ og  https://island.is/s/samgongustofa

[2] Ísing og hálka

[3] Að bera kennsl á hálku

[4] Vetrarakstur

Notkun öryggisbelta

Rannsóknarnefnd samgönguslysa telur mikilvægt að brýna fyrir ökumönnum og farþegum að nota ávallt öryggisbelti, hvort sem verið er að fara styttri eða lengri vegalengdir. Ein helsta orsök banaslysa í umferðinni er að öryggisbelti eru ekki notuð.

Notkun öryggisbelta

RNSA telur mikilvægt að brýna fyrir ökumönnum og farþegum að nota ávallt öryggisbelti, hvort sem verið er að fara styttri eða lengri leiðir. Vanhöld á notkun öryggisbelta er ein af helstu orsökum alvarlegra áverka og banaslysa í umferðinni. Athygli er vakin á þeirri hættu sem skapast getur af loftpúðum, springi þeir út þegar ökumaður/farþegar eru ekki spennti í öryggisbelti.

Akstur á móti sól sem er lágt á lofti

RNSA brýnir fyrir ökumönnum að aka varlega og með fulla athygli á akstrinum þegar útsýn er skert vegna lágrar stöðu sólar á móti akstursstefnu.

Of hraður akstur

Nefndin hefur áður fjallað um hraðakstur og afleiðingar hans í skýrslum sínum og ítrekar mikilvægi þess að ökumenn aki ekki hraðar en hámarkshraði og aðstæður leyfa hverju sinni.

Í þessu atviki var hraðinn mikill og stöðug hraðaaukning í aðdraganda slyssins. Slíkt er eingöngu heimilt í þar til gerðu afmörkuðu umhverfi akstursbrauta. Ökumaður í mikilli hröðun veitir umhverfinu minni athygli og getur mögulega verið með þrönga rörsýn beint fram veginn. Skortur á athygli með umhverfinu auk mikillar hröðunar og hraða í kjölfarið er hættuleg blanda sem á ekkert erindi í almennri umferð.

Líkur á banaslysum aukast verulega þegar um of hraðan akstur er að ræða.  Leyfður hámarkshraði hverju sinni er meðal annars miðaður við aðstæður og hönnun vega.

Gönguljós fyrir gangandi vegfarendur

Gönguljós eru til að stjórna umferð, stuðla að öryggi og vernda vegfarendur. Ef umferð á akbraut er stjórnað með umferðarljósum má samkvæmt umferðarreglum einungis ganga yfir akbrautina þegar grænt ljós er fyrir umferð gangandi vegfarenda. Þetta er til að auka umferðaröryggi og koma í veg fyrir árekstra og slys. Þegar gengið er yfir götu á rauðu gönguljósi skapar það árekstrarhættu. Það er mikilvægt að virða ávallt umferðarreglur og gönguljós.